जाजरकोट । जाजरकोटको एक सामुदायिक विद्यालयमा करोडौँ रकम हिनामिना भएको उजुरीपछि छानबिन थालिएको छ ।
जाजरकोटको नलगाड नगरपालिका–७, दल्लीमा रहेको श्री त्रिभुवन माध्यमिक विद्यालयका नाममा जम्मा गरिएको रकम हिनामिना भएको उजुरीपछि छानबिन थालिएको हो । जिल्ला प्रशासन कार्यालयको पत्रअनुसार नलगाड नगरपालिकाका प्रमुख प्रशासकीय अधिकृत दिनेश भट्टराईको संयोजकत्वमा तीन सदस्यीय छानबनि समिति बनेको थियो ।
उक्त समितिमा भट्टराईसँगै आर्थिक प्रशासन शाखा प्रमुख यामलाल ढकाल र योजना शाखा प्रमुख लालबहादुर खत्री सदस्य थिए । उक्त समितिले तयार गरेको छानबिन प्रतिवेदन अनुसार उक्त विद्यालयमा ठुलो मात्रामा रकम हिनामिना भएकोले अनुसन्धान गर्न आवश्यक देखिएको निष्कर्ष निकालेको छ ।
समितिले तयार पारेको प्रतिवेदन जिल्ला प्रशासन कार्यालय जाजरकोटलाई बुझाइसकेको पाइएको छ ।
त्रिभुवन मावि ०३८ सालबाट सञ्चालित विद्यालय हो । यही ठाउँमा चर्चित नलसिंहगाड जलविद्युत् आयोजना बन्ने चरणमा छ । उक्त आयोजनाले विद्यालयको नाममा रहेको जग्गा लिएको छ ।
आयोजनाले ०७१ साल माघ २१ गते दक्षिणतर्फको ९०–२–१–० जग्गा प्रति रोपनी चार लाखका दरले तीन करोड ६० लाख ६५ हजार ६ सय रुपैयाँ विद्यालयको नाममा भुक्तानी गरेर जमिन अधिग्रहण गरेको थियो ।
विद्यालयको नाममा बैङ्कमा जम्मा भएको रकम अहिले हिनामिना भएको आशङ्का गरिएको हो । नगरपालिकाका प्रमुख प्रशासकीय अधिकृतको टोलीले ७ दिनमा गरेको अनुसन्धानले रकम हिनामिना भएको र थप आवश्यक छानबिन गर्नुपर्ने देखाएको छ ।
प्राप्त विवरण अनुसार उक्त रकम नेपाल बैङ्कको चल्ती खातामा रहेको कोटेसन मार्फत सबैभन्दा बढी ब्याज दिने सिटिजन्स बैङ्कको जाजरकोट शाखाबाट वार्षिक ६ प्रतिशत ब्याज प्राप्त हुने गरी उक्त बैङ्कको मुद्दती खातमा जम्मा गरिएको थियो ।
रकम जलविद्युत् आयोजनाले दिएको भन्दा ३ लाख ५० हजार कम अर्थात् तीन करोड ५७ लाख १५ हजार ६ सय रुपैयाँ मात्र ०७३ साल असार २२ गते पाँच वर्षका लागि भनेर उक्त बैङ्कको मुद्दती खातमा जम्मा गरिएको देखिन्छ ।
बाँकी ३ लाख ५० हजार रकम नेपाल बैङ्क लिमिटेडको जाजरकोट शाखामा रहेको उक्त विद्यालयका निवर्तमान प्रधानाध्यापक ज्ञानेन्द्र बहादुर सिंहले अध्ययन समितिलाई जानकारी गराएका छन् । यद्यपि उक्त तथ्य विद्यालयको बैङ्क स्टेटमेन्ट छैन । सिटिजन्स बैङ्क शाखा जाजरकोटबाट प्राप्त ब्याज ९८ लाख ६६ हजार ४३२ रुपैयाँ ६७ पैसा भने प्राप्त भएको छ ।
सिटिजन्स बैङ्कमा जम्मा भएको रकममध्ये एक करोड ५० लाख ०७८ साउन १० गते साङ्ग्रिला विकास बैङ्कमा चेक क्लियरिङ्ग मार्फत रकमान्तर गरिएको छ । प्रतिवेदन अनुसार सिटिजन्स बैङ्कबाट प्राप्त ब्याज तथा साँवा रकम विभिन्न व्यक्तिको नाममा निकासा भएको छ भने अहिले बैङ्कमा कुनै पनि रकम मौज्दात छैन ।
साथै सिटिजन्स ईन्टरनेशनलमा रहेको मुद्दती खाताबाट विद्यालयले ०७६ कार्तिक १६ गते मौज्दात मध्ये मुद्दती रसिदको धितो ५० लाख कर्जा समेत उपभोग गरेको र सो कर्जा उपभोग गरेवापत् विद्यालयले ९ लाख १२ हजार ३७.७५ रुपैयाँ उक्त बैङ्कलाई ब्याज बापत बुझाएको देखिएको छ ।
५० लाख रकम लिन ०७६ कार्तिक २५ गते विद्यालय व्यवस्थापन समितिको निर्णय गरेको देखिए पनि ब्याज भुक्तानी सम्बन्धी निर्णय उपलब्ध हुन नसकेको अध्ययन समितिले जनाएको छ ।
स्रोतका अनुसार उक्त विषयप्रति अख्तियारले पनि चासोका साथ हेरिरहेको छ ।
त्रिभुवन माविका प्रधानाध्यापक ज्ञानेन्द्र बहादुर सिंहले सबै कुराहरू छानबिन समितिलाई बुझाइसकिएको बताए । सिंहले भने, ‘हामीले सबै डकुमेन्टहरू समितिलाई बुझाएका छौँ । प्रतिवेदनमा भनेजस्तो छैन होला ।’ व्यक्तिका नाममा रकम भुक्तानीको विषयमा सिंहले काम गरेपछि व्यक्तिको नाममा भुक्तानी हुन स्वाभाविक नै रहेको बताए । ‘सबै नगरपालिकाको भर परेर बस्न सकिँदैन, केही काम गर्नलाई ऋण सापट गरेर आफ्नै तरिकाले काम गर्नै पर्ने हुन्छ,’उनले भने, ‘मुद्दतीकै पैसा ल्याएर निर्माण सामग्रीको काम चाहिँ भएको छैन ।’
रातोपाटी
