२३ माघ २०८१, बुधबार

आजदेखि फागुन ६ सम्म देशैभरि पाठेघरको मुखको क्यान्सरविरुद्धको खोप दिइने

जाजरकोटमा १५ हजार किशोरीहरूलाई खोप दिइने

कर्णाली अपडेट समाचारदाता

जाजरकोट । आज विश्व क्यान्सर दिवस । यही दिवसको अवसर पारेर सरकारले आजदेखि देशभर पाठेघरको मुखको क्यान्सरविरुद्धको निःशुल्क ह्युमन प्यापिलोमा भाइरस ‘एचपीभी खोप’ दिँदैछ । विद्यालय केन्द्रित यो खोप अभियान आजदेखि फागुन ६ गतेसम्म देशभर एकै पटक सञ्चालन गर्न लागिएको हो ।

नेपालमा महिलामा हुने क्यान्सरमध्ये पहिलो स्थानमा रहेको पाठेघरको मुखको क्यान्सरको जोखिम कम गर्ने उद्देश्यले स्वास्थ्य तथा जनसङ्ख्या मन्त्रालयले देशभर एचपीभी खोप अभियान सञ्चालन गर्न लागेको हो । मन्त्रालयका अनुसार देशभर करिब १७ लाख किशोरीलाई खोप दिइनेछ ।

यस अभियानमा १६ लाख ८८ हजार ७ सय ६८ जना किशोरीलाई खोप दिइने लक्ष्य छ । विद्यालयमा अध्ययन गर्ने कक्षा ६ देखि १० सम्मका छात्रा र विद्यालयबाहिर रहेका १० देखि १४ वर्ष उमेरका किशोरीलाई खोप लगाइनेछ ।

विद्यालयका १८ हजार ९ सय र बाहिर ८ हजार २ सय खोप केन्द्रमा २७ हजार ८० स्वास्थ्यकर्मी परिचालन हुने स्वास्थ्य मन्त्रालयले जनाएको छ । यो अभियानमा ५४ हजार १ सय ६० स्वयंसेवक खटिनेछन् भने १५ हजार ६ सय ७४ जना सुपरिवेक्षक संलग्न हुनेछन् ।

नेपालमा प्रत्येक दिन पाठेघरको मुखको क्यान्सरबाट चार जना महिलाको मृत्यु हुने गरेको स्वास्थ्य मन्त्रालयको तथ्याङ्क छ । पाठेघरमा हुने क्यान्सरबाट जोगिनका लागि एचपीभी खोप लगाइन्छ । विश्वमा यो खोपको सफल परीक्षण भइसकेको छ । विश्व स्वास्थ्य सङ्गठनले मान्यता दिएको यो खोप १ सय ४५ भन्दा बढी देशमा प्रयोग भइरहेको मन्त्रालयले जनाएको छ ।

यसै बिच जाजरकोटमा पनि यो खोप अभियान सुरु भएको छ । भेरी नगरपालिका ‒१३ कुदुमा रहेको भगवती माद्यामिक विद्यालयमा एक कार्यक्रमको आयोजना गरी औपचारिक रूपमा खोप अभियान सुरु गरिएको छ ।

कक्षा ६ देखि १० सम्मका छात्राहरू र विद्यालय नजाने १० देखि १४ वर्ष उमेरका किशोरीहरूलाई खोप दिईदैछ । जाजरकोटमा १५ हजार किशोरीहरूलाई खोप दिइने स्वास्थ्य सेवा कार्यालय जाजरकोटका खोप सुपरभाइजर शान्त बहादुर बुढाथोकीले जानकारी दिनुभयो । नजिकै रहेको वडा कार्यालय, विद्यालय र स्वास्थ्य चौकीमा खोप लगाउन सकिने छ ।

खोप अभियानको शुभारम्भमा जिल्ला समन्वय समिति जाजरकोटका उप प्रमुख दलबहादुर सिंह, भेरी नगरपालिका उपप्रमुख सीता जैसी, प्रमुख जिल्ला अधिकारी मेखबहादुर मंग्रातीको उपस्थिति रहेको थियो । खोप अभियान फागुन ६ गते सम्म चल्दैछ ।

राष्ट्रिय खोप कार्यक्रममा एचपीभी समावेश गर्न सरकारले यसअघि कास्की र चितवनमा सफलतापूर्वक ‘पाइलट कार्यक्रम’ सञ्चालन गरिसकेको छ ।

२२ माघ २०८१, मंगलवार १४:१७ मा प्रकाशित
Nabintech

भरपर्दो मिडिया प्रा.लि.द्वारा प्रकाशित
कार्यालय : भेरी नगरपालिका-३, जाजरकोट
सम्पर्क नं. 9858080427
[email protected]
सूचना विभाग दर्ता न. ४३९७-२०८०/२०८१
प्रेस काउन्सिल दर्ता न. ४४००-२०८०/२०८१
सम्पादक सुरेन्द्र बहादुर सिहं

हाम्रो पुरा टीम हेर्न यहाँ क्लिक गर्नुहोस्