जाजरकोट । भेरी नगरपालिकाका नगर प्रमुख चन्द्रप्रकाश घर्तीले वडाध्यक्षले जनताको पक्षमा काम गर्न नदिएको आरोप लगाएका छन् ।
आज ( बिहीबार) पत्रकार सम्मेलनको आयोजना गर्दै नगरप्रमुख घर्तीले यस्तो बताएका हुन् । ‘हामी कार्यपालिकाको बैठकको आयोजना गर्छौ, उहाँहरू बहिष्कार गर्नुहुन्छ’ उनले भने, ‘अहिले महत्त्वपूर्ण काममा लम्किने वेला आएको छ, भूकम्पपछिको पुनर्निर्माणमा जाने वेला भए पनि उहाँहरू विभिन्न बहाना गरिरहनुभएको छ ।’
पटक पटक कार्यपालिका बैठकको आयोजना गरे पनि उहाँहरू आउनुभएको छैन्, उनले थपे, भूकम्पछिको विस्तृत क्षतिको आङ्कलन ( डिडिए) गरेर पुनर्निर्माणमा जाने वेला भए पनि उहाँहरू कार्यपालिकाको बैठकमा समेत नआउनु दुःखद कुरा भएको प्रमुख घर्तीले बताए । ‘बहुमत कार्यपालिका सदस्य जनताको पक्षमा निर्णय गर्न खोज्दा अस्वीकार गर्नुहुन्छ, उहाँहरूले जनताको पक्षमा काम गर्ने वातावरण सिर्जना गर्नुभएकै छैन, उनले थपे, ‘जनताको पक्षमा काम गर्ने जनप्रतिनिधि नखोजेर अहिले आम वडावासीले दुःख पाई रहनुभएको छ ।’ अहिले जनताको पक्षमा काम गर्ने वेला भएको र नगरपालिकामा राजनीतिक षडयन्त्र नगर्न प्रमुख घर्तीले आग्रह गरे ।
अबको कार्यपालिका बैठकमा सबैलाई उपस्थिति हुन आह्वान गरेका छन् । गत निर्वाचनमा भेरी नगरपालिकामा नेकपा एमालेले नगरप्रमुख र एक जना वडाध्यक्ष मात्रै जितेको छ । अन्य उपप्रमुख र वडाध्यक्ष नेपाली काँग्रेस र नेकपा माओवादी केन्द्रले जितको छ । उप प्रमुख र वडाध्यक्षहरूले नगरप्रमुख र प्रमुख प्रशासकीय अधिकृतले एकलौटी गर्ने गरेको आरो लगाउँदै आएका छन् । पछिल्लो समय नगरपालिका जनताको पक्षमा काम गर्नुभन्दा राजनीतिक दलहरूको खिचातानीको चपेटामा परेको आम नागरिकको बुझाई छ ।
