जाजरकोट । भेरी नगरपालिका नगर प्रमुख चन्द्रप्रकाश घर्तीले शुक्रबार पत्रकार सम्मेलनको आयोजना गरी उपप्रमुख र वडाध्यक्षले जनताको पक्षमा काम गर्न दिएनन् भन्दिए । नगरप्रमुखले शुक्रबारको पत्रकार सम्मेलनमा, अहिले भूकम्पपछिको पुर्ननिर्माणको काम अघि बढिरहेको छ, भूकम्प बाट क्षति भएका निजी आवासको विस्तृत क्षति आंकलन (डिडिए) गर्ने काममा कार्यपालिका सदस्यहरुले रोकिरहेको बताए ।
उनले भने, ‘हामीले पटकपटक बैठकको आयोजना गरेका छौं, उहाँहरु वहिष्कार गर्नुहुन्छ, अहिले जनताले सोचिरहेका छन्, यस्ता जनप्रतिनिधी किन जितायौं ।’
त्यहाँ नगरप्रमुख घर्तीले आफु मात्रै नगरवासीको हितमा काम गरिरहेको दावी गरिरहेका थिए । त्यसको भोलिपल्ट (शनिवार) उपप्रमुख सहित वडाध्यक्षहरुले पत्रकार सम्मलेनको आयोजना गरी नगरप्रमुख सँग सही भिजन र दृष्टिकोण छैन्, हामीले कहाँ रोकियौं भन्दै नगरप्रमुखको आलोचना गरे । भेरी नगरपालिका —८ का वडाध्यक्ष वीरबहादुर चन्दले आठ बर्ष सम्म नगरप्रमुखले के गरे ?
जनताले प्रश्न सोध्न आवश्यक रहेको बताए । अस्थायी आवास निर्माणमा वडा कार्यालय बाट सर्वदलीय संयन्त्रले निर्णय गरी लाभग्राही कायम भएका लाभग्राहीहरुको विपद् पोर्टलमा इन्ट्री भेरी नगरपालिकाको प्रशासनले नगरेकोले पहिलो किस्ता पाउन बाट वञ्चित रहेको उनको भनाई थियो । अहिले डिडिए बाट बञ्चित भएका सम्पूर्ण नागरिकको जिम्मा नगरप्रमुखले नलिएसम्म विपद् बैठकको औचित्य नरहेको समेत बताए ।
नगर उपप्रमुख सीता जैसी र वडाध्यक्ष वीरबहादुर चन्द द्धारा जारी विज्ञप्तीमा भनिएको छ, ‘विपद्को वेला प्राप्त राहत सामग्री पीडितलाई विपद्को समयमै उपलब्ध गराउनुपर्नेमा पालिकाको गोदाममा के कति मात्रामा छ र उक्त सामान उपभोगको समयावधि कति छ भन्ने कुरा कुनै पनि जनप्रतिनिधीलाई आधिकारिक जानकारी नभएको र नगराईएको अवगत गराउन चाहान्छौं, यस्ता सामग्री जलाउनुको विषयमा सम्पूर्ण जिम्मेवारी नगरप्रमुख र सम्बन्धित कर्मचारीले जिम्मा लिनुपर्ने कुरा अवगत गराउन चाहान्छौं ।’
अवको कार्यपालिका बैठक लाइभ गर्न समेत माग गरेका छन् । लाइभ नगरे सबै वडाध्यक्षहरुको फेसबुक अकाउण्ट बाट लाइभ गर्ने उनीहरुले बताएका छन् । एक जना वडाध्यक्ष र नगरप्रमुख घर्ती एकातिर छन् भने बहुमत सहितका कार्यपालिका सदस्य अर्कोतिर छन् । नगरप्रमुख घर्तीले जनताको हितमा हुने कुनै पनि काम गर्न नसकेको उनीहरुको आरोप छ । दुई पक्ष वीचको विवादले नगरपालिकाको सेवा प्रवाह समेत गतिलो हुन सकिरहेको छैन् ।
राजनीतिक द्धन्द्धले जनता मारमा ?
भेरी नगरपालिकामा मेयर र उपमेयरसहित अन्य वडाध्यक्षहरूबीचको निरन्तरको विवादले नागरिक अहिले मारमा परेका छन् । दुबै पक्ष एकअर्कालाई आरोप–प्रत्यारोपमा सीमित हुँदा नागरिकको दैनिकी कामकाज र भुकम्प पीडितका मुद्दा रोकिएको स्थानीयवासीको गुनासो छ ।
भेरी नगरपालिकाका मेयर चन्द्र प्रकाश घर्तीले पत्रकार सम्मेलन मार्फत उपमेयर र अन्य वडाध्यक्षहरूले आफूलाई असहयोग गरेको र नागरिक काम गर्न नदिएको आरोप लगाएका छन् । उनले भने, “जनताको सेवामा लाग्न खोज्दा कार्यपालिका सदस्यहरू राजनीतिक पूर्वाग्रहका कारण जनताको काममा अवरोध पुर्याइरहेका छन्।”
‘हामी कार्यपालिकाको बैठकको आयोजना छौं, उहाँहरु वहिष्कार गर्नुहुन्छ’ उनले भने, ‘अहिले महत्वपूर्ण काममा लम्किने वेला आएको छ, भूकम्पपछिको पुर्ननिर्माणमा जाने वेला भएपनि उहाँहरु विभिन्न वहाना गरिरहनुभएको छ ।’ पटकपटक कार्यपालिका वैठकको आयोजना गरेपनि उहाँहरु आउनुभएको छैनन्, उनले थपे, भूकम्पछिको विस्तृत क्षतिको आँकलन (डिडिए) गरेर पुर्ननिर्माणमा जानेवेला भएपनि उहाँहरु कार्यपालिकाको वैठकमा समेत नआउनु दुःखद कुरा भएको प्रमुख घर्तीले बताए । वडाध्यक्षहरूले अनावश्यक अड्को थापेको आरोप समेत लगाए ।
तर, उपमेयर र वडाध्यक्षहरूको फरक धारणा छ । उपमेयर र वडाअध्यक्षहरूले अर्को पत्रकार सम्मेलन गर्दै मेयर घर्तीमाथि मनोमानी शैलीमा नगर सञ्चालन गरेको आरोप लगाए । वडा नं ८ का वडाअध्यक्ष वीर बहादुर चन्दले भने, “नगरपालिकाको सञ्चालनमा पारदर्शिता छैन। मेयरले कुनै पनि निर्णय गर्दा छलफल नगरी एकलौटी ढंगले अघि बढ्न खोजे ।” कुनै पनि कार्यपालिका बैठक बोलाईएको छैन, ४८ घण्टा भित्र लाईभ सहितको बैठक बोलाउन आग्रह गरे ।
मेयर र कार्यपालिका सदस्यहरूबीचको द्वन्द्वका कारण भेरी नगरपालिकामा भुकम्प पीडितलाई सबैभन्दा बढी असर परेको छ । भने स्थानीय जनताले सेवा प्रवाहमा ढिलासुस्ती भएको र दैनिक प्रशासनिक कामकाजमा अवरोध खडा भएको गुनासो गरेका छन् ।
१३ नं. वडाका एक स्थानीय बासिन्दा बताउँछन्, “हामीले चुनेका जनप्रतिनिधिहरू आपसी कलहमा अल्झिँदा सामान्य सिफारिस लिन समेत लामो समय कुर्नुपरेको छ । जनताको काममा राजनीति नगर्न सबै पक्षलाई आग्रह गर्छौँ ।”
नागरिक समाजका अगुवा राजेन्द्र विक्रम शाहका अनुसार नगरपालिकाभित्रको यो विवाद तत्काल समाधान नगर्ने हो भने जनतामा निराशा बढ्दै जानेछ । उनी भन्छन्, “दुवै पक्षले आपसी संवादलाई प्राथमिकता दिनुपर्छ । कानुनी व्यवस्था र जनप्रतिनिधीहरूको भूमिकालाई सम्मान गर्दै सहकार्य आवश्यक छ ।”
स्थानीय सरकार सञ्चालन ऐन, २०७४ ले कार्यपालिका बैठकमा निर्णय प्रक्रियाबारे स्पष्ट व्यवस्था गरेको छ । कानुनी प्रक्रियाअनुसार छलफल, बहुमतबाट निर्णय र पारदर्शिता कायम गर्नुपर्ने प्रावधान भए पनि भेरी नगरपालिकामा यो अभ्यास हुन नसक्दा विवाद चुलिएको देखिन्छ ।
यदि यो द्वन्द्व दीर्घकालसम्म रहिरह्यो भने नगरपालिकाको विकासमा दीर्घकालीन असर पर्ने र जनताले भोग्नुपर्ने समस्याहरू अझ गहिरिने नेपाल पत्रकार महासघ जाजरकोटका अध्यक्ष सुरेन्द्र बहादुर सिहको भनाइ छ ।
उनी भन्छन्, ‘भेरी नगरपालिकामा मेयर र वडा अध्यक्षहरूबीचको लामो समयदेखिको आपसी द्वन्द्वले नगरपालिकाको समग्र विकासलाई ठप्प बनाइनु दुर्भाग्य हो, दुबै पक्ष जनताको मतबाट निर्वाचित भए पनि, व्यक्तिगत स्वार्थ र राजनीतिक खिचातानीका कारण जनताको मतलाई नै अवमूल्यन गर्नु असल राजनीतिक संस्कार होईन । जनताले विश्वास गरेर निर्वाचित गरेका प्रतिनिधिहरूबीचको असमझदारीले विकास निर्माणका कार्यहरू प्रभावित आखिर कहिले सम्म हुने ?’
निर्वाचित जनप्रतिनिधिहरूले आपसी विवादलाई छोडेर जनताको म्यान्डेटको सम्मान गर्दै विकास, सेवा प्रवाह र नागरिकका आवश्यकतामा ध्यान दिन जरुरी छ ।
भेरी नगरपालिकामा उत्पन्न यो विवाद तत्काल समाधान गर्न दुवै पक्षले संवादमार्फत सहकार्य गर्नुपर्ने देखिन्छ । अन्यथा, जनताले चुनेका प्रतिनिधिहरूबीचको कलहले स्थानीय विकासलाई पूर्ण रूपमा ठप्प पार्ने जोखिम छ ।
(यस बारेका अन्य सामग्री नियमित प्रकाशन गर्नेछौं : सम्पादक)
