जाजरकोट । जाजरकोटको छेडागाड नगरपालिका वडा नं. ८ र ९ को सिमानामा पर्ने बार्न नाउरीघाट भन्ने स्थानमा डबल क्याप बोलेरो जिप दुर्घटना हुँदा दुई जनाको घटनास्थलमै मृत्यु भएको छ।
पजारुबाट थलह आउँदै गरेको कर्णाली प्रदेश ००१ च १३२७ नम्बरको बोलेरो जिप सडकबाट करिब १ सय ५० मिटर तल खसी दुर्घटनामा परेको हो।दुर्घटनामा परी सोही स्थानका २८ वर्षीय राजु अधिकारी र ७० वर्षीय नन्दकला अधिकारीको घटनास्थलमै मृत्यु भएको जिल्ला प्रहरी कार्यालय जाजरकोटका सूचना अधिकारी सुधीर खड्काले जानकारी दिनुभयो।
जिपमा चालकसहित ६ जना सवार थिए। दुर्घटनामा परि घाइते हुनेहरूमा सोही वडाकै चालक वर्ष २४ का कृष्ण अधिकारी, वर्ष २० कि लक्ष्मी खत्री, वर्ष ३९ का वीर बहादुर अधिकारी र दैलेख नौमुले गाउँपालिका वडा नं ६ घर भएका वर्ष २३ कि शीतला रावत रहेको खड्काले बताउनु भयो ।
दुर्घटनामा परि घाइते भएका ४ जनालाई उद्धार गरी उपचारका लागि छेडागाड नगर अस्पताल लगिएको छ। घाइतेहरूको अवस्था मध्यम रहेको प्रहरीले जनाइएको छ।
जिपको ब्रेक फेल भएर दुर्घटना परेको प्रहरीले जनाएको छ ।
