जाजरकोट । जाजरकोटको भेरी नगरपालिका–२, राङ्सीमा अविरल वर्षासँगै आएको पहिरोले अस्थायी टहरा पुर्दा एक वृद्धाको ज्यान गएको छ।
असार २८ गते राति अन्दाजी ८ बजेको समयमा माथिबाट खसेको पहिरोले टहरा च्याप्दा त्यहाँ बस्दै आएकी अन्दाजी ६० वर्षीया जयशिला शाहको घटनास्थलमै मृत्यु भएको जिल्ला प्रहरी कार्यालय जाजरकोटका प्रहरी नायब उपरीक्षक बुद्धि सागर पुरीले जानकारी दिनुभयो।
पहिरोमा परी टहरामा रहेका अन्य दुई जनाको भने सकुशल उद्धार गरिएको छ। मृत्यु हुने जयशिलाकी छोरी अन्दाजी ४० वर्षीया मेनुका शाह थापा र निजकी ७ वर्षीया छोरी (जयशिलाकी नातिनी) टिका थापालाई सुरक्षित रूपमा उद्धार गरिएको हो।
अविरल वर्षाका कारण माथिबाट खसेको ढिस्कोले उनीहरू बसिरहेको अस्थायी टहरालाई च्यापेको थियो। घटनाको जानकारी पाउनासाथ स्थानीय र प्रहरीको सहयोगमा उद्धार गरिएको थियो।
२९ असार २०८३, सोमबार ०८:३४ मा प्रकाशित










